“Furtuna” nëpër servise, DPSHTRR: Kushtet që duhen plotësuar, vëmendja te dëshmia e aftësisë

Me nisjen e aksionit nëpër serviset e automjeteve, Drejtoria e Përgjithshme e Shërbimeve të Transportit Rrugor ka publikuar të gjitha kriteret që duhet të plotësohen nga këto subjekte, në mënyrë që të mos jenë objekt penalizimi.

Kriteret ndahen në drejtim të pajisjeve dhe instrumenteve që duhet të disponohen sipas aktivitetit të ushtruar dhe në drejtim të ambientit ku ushtrohet ky aktivitet.

Përfaqësues të këtij dikasteri thanë për TV SCAN se gjatë kontrolleve një vëmendje do i kushtohet Dëshmisë së Aftësisë Profesionale të përgjegjësit teknik, duke qenë se nga informacionet paraprake rezulton se numri i serviseve të licencuar është tejet i lartë, ndërkohë që numri i këtyre dokumenteve që lëshohen nga DPSHTRR mbetet në nivele të ulët.

Ndërkaq, referuar natyrës së shërbimeve, për subjektet që ofrojnë riparimin dhe mirëmbajtja e pjesëve mekanike dhe të motorit, riparimin dhe mirëmbajtjen e karrocerisë si dhe ata që bëjnë riparimin dhe mirëmbajtjen e impiantit elektrik apo gomave duhet të ushtrojnë aktivitetit në një hapësirë jo më të vogël se 30 m katror.

Ndërkohë që, për ato subjekte të cilët ushtrojnë aktivitet në drejtim të blerjes dhe shitjes së mjeteve nevojiten minimalisht 50 m katror, kompjuter,  2 pajisje të mbrojtjes nga zjarri dhe kutia e ndihmës së shpejtë.

Nga ana tjetër kategoria e bizneseve që merret me mbledhjen, depozitimin dhe shkatërrimi i mjeteve ose pjesëve të tyre të dala jashtë përdorimit apo të braktisura, përveç këtyre mjeteve duhet të disponojë dhe fuçi për grumbullimin e vajrave dhe minimalisht 100 m katror në dispozicion për të ushtruar aktivitetin.

Të gjithë subjektet e lartpërmendur duhet të kenë nyjen sanitare dhe një zyrë për kryerjen punëve administrative. Aksioni i paralajmëruar nisi në datën 2 maj, ndërkohë që mosplotësimi i këtyre kritereve pasohet me masa administrative, që variojnë nga 200 mijë-400 mijë lekë.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.