Gara e makinave pa shoferë, kompanitë kineze shtojnë gazin dhe marrin kryesimin

Një grup kompanish të reja kineze po përshpejtojnë përpjekjet për të vendosur automjete autonome në rrugë në tregun më të madh të makinave në botë. Nga ana tjetër, kompanitë amerikane që po testojnë të njëjtën teknologji, Waymo dhe Cruise, e kanë të vështirë të futen në Kinë.

Roadstar.ai po teston makinat pa shofer në metropolin jugor të Shenzen dhe shpreson të hedhë në rrugë rreth 1500 copë deri në vitin 2020. Kompania po teston nivelin 4 të vetëdrejtimit, çka kërkon shumë pak ndërhyrje njerëzore dhe mund të përballojë mjaft mirë xhunglën urbane të Kinës.

Ndërkohë, Pony.ai planifikon të vendosë një flotë prej 20 makinash vetëdrejtuese në rrugët e Guanzhou vitin e ardhshëm, të cilat do të përdoren si shërbim taksi. Ajo pret ta komercializojë teknologjinë brenda 3 apo 5 vitesh për t’u përdorur në kushte të kontrolluara në ambiente si porte apo parqe industriale.

Kompania Momenta, e mbështetur nga prodhuesi gjerman Daimler (Mercedes), sapo ka firmosur një kontratë me qeverinë e Suzhou për të vendosur një flotë në këtë qytet brenda vitit dhe për të ofruar shërbime për qytetarët së shpejti. Aktualisht ajo po përgatit programet për të krijuar një hartë virtuale me rrugët e qytetit.

Këto tre kompani u bashkohen Baidu dhe NIO, të cilat po shfrytëzojnë gatishmërinë e qeverive lokale për të vendosur rrugët e tyre në testim për këtë teknologji dhe të dyja shpresojnë të bëjnë përparime të mëdha në këtë drejtim.

Kina shpreson që brenda dekadës të ketë 30 milionë automjete autonome në rrugë, me një bazë prej 300 milionë përdoruesish.

Ky objekti i qeverisë qendrore dhe mungesa në treg e liderëve botërorë Waymo dhe Cruise ka bërë që kompanitë kineze të marrin një mbështetje të madhe si nga qeveritë, ashtu edhe nga investitorët.

Prodhuesit e automjeteve në Kinë kanë gjithashtu një tjetër arsye pse të mbështeten tek kompanitë vendase për këtë teknologji. Sipas tyre, algoritmet kineze janë të përshtatura me rregullat e qarkullimit dhe me skenarët e ndryshëm të trafikut të ngjeshur, krahasuar me trafikun më të lehtë dhe më me hapësirë në Shtetet e Bashkuara. Për këtë arsye, ata besojnë se zgjidhjet për vetëdrejtimin në Kinë mund të ofrohen vetëm nga kinezët.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.