“Gara” mes pagave dhe inflacionit, si paraqitet situata në Shqipëri – Ja kur përfitojmë dhe kur humbasim
Prej mbi një viti tashmë rritja e pagave për shqiptarët, bazuar mbi të dhënat zyrtare, rezulton si reale, duke arritur të tejkalojë rritjen e çmimeve. Të paktën kjo rezulton nga grafiku i mëposhtëm i përpunuar nga SCAN mbi shifrat e INSTAT, që tregon raportin mes ecurisë së pagave dhe çmimeve që prej vitit 2016, duke shfrytëzuar treguesit e pagës mesatare mujore të të punësuarve me pagë dhe indeksit të çmimeve të konsumit (inflacioni),
Që prej tremujorit të dytë të vitit 2017, niveli i jetesës i shqiptarëve duket të jetë në rritje, të paktën përsa i përket këtyre dy treguesve të INSTAT. Ky pohim vlen më tepër veçanërisht për të punësuarit në administratën publike, ku pagat mesatare janë më të larta, por edhe janë rritur më shpejt gjatë vitit 2017, duke arritur deri në 12.8% mbi nivelin e një viti më parë.
Në kohëra të tilla, njerëzve u lindin mundësitë për të shpenzuar më tepër për mallra apo shërbime, diçka që nxit edhe blerjet në tregtinë me pakicë apo industrinë e argëtimit, ushqimit dhe akomodimit.
Megjithatë, kjo periudhë ku pagat tejkalojnë çmimet pritet të zbutet gjatë muajve në vijim për shkak se çmimet po rifitojnë vrullin e rritjes.
Inflacioni duket se do të rritet drejt objektivit të 3% të Bankës së Shqipërisë. Gjatë muajit qershor, indeksi i çmimeve të konsumit u rrit me 2.4%, norma më e lartë që prej Janarit 2017. Javët e fundit gjithashtu duket se është ndalur mbiçmimi i lekut në kursin e këmbimit, i cili po zbuste efektin e rritjes së çmimeve.
Kur çmimet rriten më shpejt se sa pagat, të mirat materiale dhe kostot si qiraja apo faturat bëhen më të shtrenjta për individët, të cilët detyrohen të shkurtojnë shpenzimet për argëtim apo veshje.
Ndërkohë politika e rritjes së pagave në administratë, sipas zërit të alokuar në buxhetin e shtetit, do të vijojë edhe gjatë këtij viti. Megjithatë në sektorin privat dhe për të vetëpunësuarit, rritja ka qenë më e ulët dhe e ngadaltë.
Analiza merr në konsideratë vetëm dy treguesit, ndërkohë që padyshim ndikojnë në uljen apo rritjen e kostove të jetesës një sërë faktorësh të tjerë.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.