Gara Paund/Lek- Çfarë ka ndodhur në 6 ditët e fundit dhe cilat janë pritshmëritë
Që prej datës 10 tetor, paundi britanik ka njohur një rritje të shpejtë, duke marrë një kthesë historike përballë valutave të huaja. Kjo rritje është ndjerë edhe kundrejt lekut shqiptar.
Referuar kursit zyrtar të Bankës së Shqipërisë, me 9 tetor paundi britanik këmbehej me 136.75 lekë ndërsa me 10 tetor paundi u rrit lehtësisht duke u këmbyer me 136.89 lekë.
Raporti ndryshoi ndjeshëm me 11 tetor, kohë kur në debatin publik u rikthyen diskutimet për avancimin e procesit të daljes së Britanisë nga Bashkimi Europian në një kohë kur ishte konstatuar një ngecje nga palët.
Ashtu si me dollarin e monedhat e tjera, paundi pësoi një rritje të paprecedentë edhe kundrejt lekut duke u këmbyer me 139.85 lekë, një rritje e fortë me 3 pikë. Ritmet e rritjes vijuan edhe në ditët në vijim, ku thuajse çdo ditë paundi njeh një rritje me 1 pikë kundrejt lekut. Tashmë paundi këmbehet me 142 lekë. Në total, për 6 ditë (10-16 tetor) paundi është rritur nga 136 lekë në 142 lekë, pra me 6 pikë.
Por a do të jetë e qendrueshme kjo rritje edhe në ditët në vijim? Për këtë duhen analizuar pritshmëritë që ka në tregjet ndërkombëtare, që reflektohen më pas edhe në tregun shqiptar të këmbimit valutor.
Pritshmëritë janë që në këto orë të paraqitet teksti i një marrëveshje për daljen e Britanisë nga Bashkimi Europian, çka mund të reflektohet ndër të tjera edhe në forcimin e mëtejshëm të paundit britanik.
Nëse marrëveshja dështon, atëhere kjo parashikohet të ndikojë negativisht duke bërë që paundi britanik të ndërmarrë hapa pas e të dorëzojë “forcën” e fituar kundrejt monedha të huaja në 6 ditët e fundit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.