Gara për Prokurorin e Përgjithshëm – Depozitojnë zyrtarisht kandidaturat Fatjona Memçaj dhe Avokati Lulzim Alushaj
Pas Olsian Celës, në Këshillin e Lartë të Prokurorisë janë depozituar edhe dy kandidatura të tjera për të pasuar Arta Markun në kreun e organit të akuzës. Bëhet fjalë për Prokuroren e Apelit të Tiranës Fatjona Memçaj, dhe Avokatit Lulzim Alushaj.
Memçaj është një prej emrave të parë që kaloi me sukses sitën e Veting-ut në fillim të vitit të shkuar falë një pasurie familjare modeste dhe rezultateve pozitive në dy komponentët e tjerë, integritetin dhe aftësitë profesionale.
Ndërkohë që Avokati Alushaj prej vitit 2005, ai ka marrë titullin profesional “Avokat nga Dhoma Kombëtare e Avokatisë” në Itali. Ai gjithashtu është doktor i shkencave juridike me rezultate të shkëlqyera në Napoli.
Vetë Arta Marku, aktualisht Kryeprokurore e Përkohshme është një prej emrave që me shumë gjasa do të garojë për postin e Kryeprokurorit të Përgjithshëm, ndërkohë që në qarqet juridike është folur edhe për një kandidaturë të tretë që do vijë nga Adnan Xholi, ish kreu i Prokurorisë së Krimeve të Rënda.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.