Gara për shefin e ri të Eurogrupit. Ministrat e Spanjës, Irlandës dhe Luksemburgut, shihen si kandidatët kryesorë

Ministrat e Financave të Spanjës, Luksemburgut dhe Irlandës, po garojnë për postin e shefit të ardhshëm të Eurogrupit, në  një periudhë ku rajoni po përballet me një nga krizat më të ashpra ekonomike në histori. Eurogrupi, që përbëhet nga 19 ministrat e financave  të Eurozonës, po kërkon për një president të ri, pasi Mario Centeno, ministri socialist i Financave në Portugali, përfundon mandatin më 13 Korrik, pas 2 vite e gjysmë në detyrë.  Nadia Calvino e Spanjës, Paschal Donohoe nga Irlanda dhe Pierre Gramegna i Luksemburgut, janë 3 kandidatët për pozicionin.  I pari që do të marrë 10 ose më shumë vota nga 19 ministrat më 9 Korrik, do të bëhet shefi i ri.

Eurogrupi miratoi në muajin Prill plane për të ofruar 540 miliardë euro në masa fiskale për të zbutur ndikimin ekonomik të pandemisë. Megjithatë, duhen më shumë negociata për masa të tjera të stimujve, ndërkohë që Komisioni Europian sugjeroi huamarrje prej 750 miliardë euro në tregje dhe të japë grante për vendet anëtare dhe sektorët që janë goditur më shumë nga pandemia.

Ky plan ka ngritur debate jo vetëm tek 19 vendet e Eurozonës, por për të gjithë Bashkimin Europian. Disa vende shqetësohen se plani për të disbursuar 500 miliardë euro në grante është shumë i dorëlëshuar.  Qeveri të tjera, nuk kërkojnë që stimujt fiskalë të vijnë në formën e paketave të shpëtimit, si në rastin e krizës së borxhit të Eurozonës në vitin 2011.

Këto ndasi pritet të ndikojnë tek votimi i ministrave për presidentin e ardhshëm të Eurogrupit pas 2 javësh.

Klevis Llaha / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.