Gara për “Telekom Albania”, jo vetëm Telekom Srbja! Cilat janë 2 kompanitë e tjera? Njëra shtetërore, tjetra në pronësi të miliarderit çek
Në garë për të blerë Telekom Albania, tashmë të nxjerrë në shitje nga Deutsche Telekom, përveç Telekom Srbija që e ka konfirmuar edhe zyrtarisht ofertën e saj për Telekom Albania, në garë janë të paktën edhe dy kompani të tjera, bullgarja Vivacom dhe kompania ceke por me bazë në Holandë, PPF, që është e shtrirë në shumë sektorë, raporton SCAN. Grupi OTE që është nën pronësinë e deutsche telekom e që kontrollon telekom Albania ndërkohë e ka konfirmuar zyrtarisht për `Scan` se është në negociata me kompani të tjera.
Telekom Srbija
“Telekom Srbija” është e pranishme në tregun boshnjak, malazez dhe atë austriak, përveç Serbisë. Kompania në fjalë është me e madhja në sektor në Serbi, si dhe më e madhja për ofrimin e shërbimit të internetit. “Telekom Srbija” ka 1 miliard dollarë të ardhura në 2017 dhe 124 milionë euro fitime neto. Aksionerja kryesore e kompanisë është qeveria serbe, me 58% të aksioneve, ndërkohë që 15% të aksioneve e kanë qytetarët e Serbisë dhe rreth 7% punonjësit dhe ish-punonjësit.
Vivacom
Kompania tjetër në garë është bullgarja e “Vivacom”, që është kompania më e madhe e telekomunikacionit në Bullgari, si në drejtim të telefonisë celulare ashtu edhe në drejtim të shërbimit të internetit, duke zënë mbi 80% të tregut. Edhe kjo është një kompani e drejtuar nga shteti. Të ardhurat e “Vivacom” në vit janë sa gjysma e atyre të “Telekom Srbija”.
PPF
PPF ndërkohë ka një profil krejt tjetër nga dy kompanitë e tjera në garë, pasi është një grup ndërkombëtar investimesh me bazë në Holandë, zotëruesi i së cilës është çeku Petr Kellner, njeriu i cili me 15 miliard dollarë pasuri zë vendin e 88-të në listën e më të pasurve të botës.
PPF është e pranishme në 22 shtete dhe fokusohet në shumë sektorë, që nga bankat, real estate, sigurimet, shitja me pakicë, telekomunikacioni etj. Vetëm fitimet e kompanisë llogariten në 1.1 miliard dollarë në vit.
Pra, në garë për të blerë “Telekom Albania”, deri më tani janë tre profile mjaft interesante, që në rast se arrijnë marrëveshjen do të shkaktojnë shumë debat. Dy të parat parat për shkak se bëhet fjalë për dy kompani që i zotëron shteti, dhe e treta pasi përkthehet në afrimin e një prej njerëzve më të pasur të botës në tregun shqiptar. Por, nuk përjashtohet as mundësia që në garë të hyjë një ose disa kompani të tjera.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.