Garë e “çmendur” në Francë – Sondazhet, katër kandidatët janë vetëm 3% larg
Gara presidenciale në Francë vijon të ngushtohet gjithmonë e më shumë në një kohë që francezët po bëhen gati të votojnë kandidatin e tyre më 23 prill, kur do të zhvillohet edhe raundi i parë i zgjedhjeve, e nga i cili do të dalin dy kandidatët final.
Pavarësisht afrimit të kandidatëve të tjerë, favoriti në garë mbetet Emmanuel Macron i qendrës së majtë. Të paktën këtë tregojnë sondazhet. Por, nga ana tjetër, pas asaj që ndodhi në Britani dhe në Shtetet e Bashkuara të Amerikës, sondazhet kanë humbur një pjesë të madhe të besueshmërisë që kishin.
Këtë besueshmëri në Francë e minon edhe norma e lartë e elektoratit gri, atij të pavendosur. Gjithsesi, sondazhet e fundit, të publikuara të Premten, nxjerrin Macron dhe Le Pen, kryesueses së garës me nga 22% të votave, çka i projekton të dy kandidatët si finalistë të garës përfundimtare të 7 majit.
Jean luc Melenchon i ekstremit të majtë është ngjitur në vend të tretë, me 20% të votave dhe Francois Fillon i katërti me 19% të votave. Kandidati socialist duket se është tërësisht jashtë garës ndërkohë.
Lajmi i ditës mbetet Jean Luc Melenchon, për të cilin sondazhet tregojnë se në rast kalimi në raundin e dytë, do të vinte në vështirësi Emmanuel Macron, ndryshe nga Le Pen e cila do të “shpartallohej”.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.