Gazetaria e pavarur, Vlahutin: BE, mbështetje financiare. Vokshi: Paketë ligjore
Bashkimi Evropian do të mbështesë financiarisht gazetarinë e pavarur, si një instrument për zhvillimin e demokracisë. Gjatë një forumi mbi Zhvillimin e Lirisë së Medias ambasadorja e BE-së, Romana Vlahutin foli për vështirësitë që hasin gazetarët shqiptarë në punën e tyre të përditshme, ndërsa kërkoi nga institucionet më shumë transparencë për fondet publike.
“Bashkimi Europian do të vazhdojë mbështetjen e kësaj pune në mënyrë financiare deri në 2018. Ka respekt të ultë për sa i përket kodit të etikës dhe kodit të punës. Ka rroga të vogla, të cilat vijnë me vonesë, ka mangësi në pagesat e sigurimeve shoqërore. Kemi gazetarë, të cilët punojnë pa kontrata ose me kontrata që përfundojnë. Një punësim i tillë me të tillë kushtesh punësimi, të përkeqësuar nga presioni i tregut janë të papranueshme. Autoritetet shqiptare gjithashtu duhet të forcojnë implementimin e aksesit ndaj informacionit dhe në veçanti për sa i përket kontratave të prokurimit, rezultatet e auditeve gjithçka që është e lidhur me paratë dhe financat publike”, tha Vlahutin
Kreu i prezencës së OSBE kërkoi raportime kritike të bazuar në fakte nga ana e medias në drejtim të qeverisë. Ndërkohë që, kryetarja e Komisionit Parlamentar të Medias Albana Vokshi dënoi gjuhën e urrejtjes së Kryeministrit ndaj gazetarëve.
“Ndaj sot dua të shpreh me shqetësim të madh të agresionin të paprecedentë të kreut të qeverisë ndaj mediave, të cilat ai i quan media “kazani” dhe sidomos ndaj gazetarëve për të cilët nuk kursen një lumë sharjesh apo fyerjesh. As Fidel Kastro në regjimin e tij nuk ka ushtruar këtë lloj gjuhe dhune, urrejtje ndaj gazetarëve. Ndaj unë mendoj të gjithë ne, pa përjashtim, të gjithë shoqatat e gazetarëve dhe faktori ndërkombëtar nuk duhet të heshtim”, u shpreh Vokshi
Vokshi kërkoi edhe hartimin e një pakete ligjore, e cila të ketë në fokus mbrojtjen e statusit të gazetarit.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.