“Gërshëra” mbi investimet publike – Projektbuxheti 2020/ Ulen infrstruktura, Turizmi dhe Drejtësia

Për një pjesë të konsiderueshme të ministrive, dhe specifikisht disa sektorëve, zëri i investimeve publike është shkurtuar ndjeshëm për vitin 2020. Konkretisht, infrastruktura ka pasur edhe reduktimin më të lartë të fondeve, me 4.5 miliardë lekë, krahasuar me të dhënat e aktit normativ 2019.  Kjo për shkak se nuk do të ketë projekte të reja infrastrukturore dhe se pjesa e fondeve që janë akorduar do të shkojnë për të kompletuar akset e nisura dhe për të paguar detyrimet kontraktore.

Në këtë pikë, rreth 3 miliardë lekë i janë hequr transportit rrugor, por është prekur edhe buxheti i furnizimit me ujë dhe kanalizime.  Po ashtu, shkurtim  shpenzimesh kapitale është parashikuar dhe për Ministrinë e Financave dhe të Ekonomisë në rreth 1.3 miliardë lekë, i përqendruar kryesisht në zërin e menaxhimit të të ardhurave tatimore dhe menaxhimin e të ardhurave doganore.

Ndërkaq, 0.5 miliardë lekë i janë hequr edhe Ministrisë së Brendshme,  ku janë prekur kryesisht fondet për policinë e shtetit, dhe financimet për prefekturat dhe funksionet e deleguara të pushtetit vendor. Shkurtim fondesh, por më minimaliste, ka pasur edhe për Ministrinë e Drejtësisë, Ministrinë e Jashtme dhe atë të Turizmit.

Shkurtim fondesh për 2020-ën

Ministria e Infrastrukturës  – 4.5 miliardë lekë

Ministria e Financave – 1.3 miliadrë lekë

Ministria e Brendshme  – 0.5 miliardë lekë

Ministria e Drejtësisë – 242 milionë lekë

Ministria e Jashtme – 160 milionë lekë

Ministria e Turizmit -70 milionë lekë

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.