Gjallërimi i kreditimit – Bankat rrisin huamarrjen nga BSH
Bankat tregtare kanë rritur ndjeshëm huamarrjen nga banka qendrore përmes marrëveshjeve të riblerjes. Sipas të dhënave nga Banka e Shqipërisë, në mars të këtij viti vlera e huasë për sektorin bankar arriti në 42 miliardë lekë, afro 60% më shumë krahasuar me të njëjtën periudhë të një viti më parë.
Rritja e huamarrjes nga Banka Qendrore është rritur ndjeshëm duke filluar nga gjysma e dytë e vitit të kaluar. Mes të tjerash, kjo është një tregues i gjallërimit të kreditimit të ekonomisë.
Sipas Bankës së Shqipërisë, në fund të marsit portofoli i kredisë në lekë ishte 7.2% më i lartë krahasuar me të njëjtën periudhë të një viti më parë. Kur bankat kërkojnë më shumë hua nga Banka Qendrore për nevoja afatshkurtra, zakonisht jo tregon se ato janë më aktive në huadhënie apo në forma të tjera të investimit financiar.
Marrëveshjet njëjavore të riblerjes janë forma më e zakonshme e mbështetjes afatshkurtër me likuiditet e Bankës Qendrore për bankat tregtare. Çmimi i këtij instrumenti përfaqëson edhe normën bazë të interesit, që aktualisht është 1.25%, niveli më i ulët i aplikuar ndonjëherë në Shqipëri.
Ulja e normës bazë e bën më të lirë për bankat huamarrjen nga Banka e Shqipërisë dhe, përmes mekanizmave të transmetimit, përcillet edhe në interesat e instrumenteve të tjera financiare më afatgjata, si depozitat dhe kreditë bankare apo letrat e borxhit të qeverisë shqiptare.
Sa më shumë bankat e përdorin këtë instrument, aq më shumë Banka e Shqipërisë arrin në qëllimin për të përcjellë politikën e saj monetare në tregun financiar. Në rastin konkret, qëllimi i Bankës Qendrore është që paraja të jetë sa më e lirë, për të nxitur konsumin dhe investimet.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.