Gjallërohet jeta ekonomike – Ngrenë qepenat një sërë biznesesh me mbi 27 mijë punonjës
E hëna e 27 Prillit ka ofruar një pamje ndryshe në kryeqytet dhe jo vetëm, ku 17 kategori të reja biznesesh kanë ngritur qepenat me urdhër të qeverisë, për të rifilluar rutinën, aty ku e lanë, thuajse dy më parë.
Lista e bizneseve të hapur fillon nga tregtia e veshjeve dhe mallrave të tjerë, aktiviteti i taksive, tregtia me pakicë e tekstileve, këpucëve, e luleve, bimëve, farave, plehëruesve, kafshëve të shtëpisë dhe ushqimit të tyre në dyqane të specializuara, tregtia e pakicë e orëve dhe bizhuterive në dyqane të specializuara, e pajisjeve audio dhe video; tregtia me pakicë e lojërave dhe lodrave në dyqane të specializuara ; shitja e pajisjeve sportive në dyqane të specializuara e deri tek shitja me pakice e sistemeve te sigurisë/ pajisjet e telekomunikacionit ne dyqane te specializuara. Vendimi i qeverisë ka bërë që 27 589 punonjës të regjistruar në këto biznese të fillojnë punën normalisht me orare zyrtare.
Nga një vëzhgim i bërë më kamerën e SCAN duket se rinisja e jetës ekonomike për një listë të gjerë biznesesh, ka sjellë më shumë gjallëri në rrugët e kryeqytetit dhe më shumë lëvizje të qytetarëve, për të përmbushur nevojat e lëna pezull për shkak të masave kufizuese të ndërmarra në kuadër të COVID-19. Ndërkohë, pavarësisht fillimit të punës përfituesit nga Paketa e Parë apo Paketa e Zgjeruar, nuk do ta humbasin mbështetjen financiare prej 26.000 për 3 muaj apo 40.000 lekësh për një muaj.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.