GJED: Linjat ajrore jo-BE janë përgjegjëse për kompensim për fluturimet e vonuara ose të anuluara!
Gjykata e lartë e BE-së të enjten hapi rrugën për pasagjerët që të kërkojnë kompensim për fluturimet e vonuara nga linjat ajrore jo-BE që operojnë fluturime në emër të transportuesve nga brenda bllokut. Vendimi i Gjykatës së Drejtësisë së Bashkimit Europian (CJEU) me qendër në Luksemburg është i fundit për të rritur të drejtat e pasagjerëve për t’u rimbursuar për vonesat ose anulimet e fluturimeve.
Rasti i së enjtes kishte të bënte me tre pasagjerë, të cilët bënë një rezervim të vetëm me Lufthansa nëpërmjet një agjencie udhëtimi për një fluturim nga Brukseli në San Jose në Shtetet e Bashkuara. Fluturimi u krye tërësisht nga United Airlines. Tre udhëtarët mbërritën në destinacionin e tyre me 223 minuta vonesë dhe më pas paditën United Airlines në një gjykatë holandeze për kompensim.
GJED-ja mbështeti pretendimin e tyre, duke thënë se United Airlines më pas mund të kërkonte kompensim nga palët e treta. “Pasagjerët e një fluturimi të vonuar mund të kërkojnë kompensim nga një transportues ajror jo-BE, kur ai transportues operon të gjithë fluturimin në emër të një transportuesi të BE-së,” thanë gjyqtarët.
“Transportuesi ajror që operon (United Airlines) i cili është i detyruar të kompensojë një pasagjer ruan të drejtën për të kërkuar kompensim nga çdo person, përfshirë palët e treta, në përputhje me legjislacionin kombëtar në fuqi.” Rasti është C-561/20 United Airlines. RTS
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.