“Gjeografia” e eksporteve/Shqipëria rritje me 142 % me Spanjën në 4 muajt e parë të 2017! Grupmallrat që kanë ndikuar

Gjatë katër muajve të parë të vitit 2017, Shqipëria ka njohur një rritje të konsiderueshme të eksporteve me Spanjën. Referuar të dhënave të tregtisë së jashtme të publikuara nga INSTAT, rezulton se rritja është 142 %.

Nëse analizojmë raportin, rezulton se zëri që ka pasur më shumë rritje është “minerale, lëndë djegëse e energji elektrike” ku eksportet nga 614 milion lekë janë rritur në rreth 3.2 miliard lekë. Një rritje të vogël ka njohur zëri “ushqim, pije, duhan” ku nga 262 milion lekë, eksportet me Spanjën për këtë kategori janë rritur në 298 milion lekë.

Ndërkohë, në 4 muajt e parë të këtij viti, ndryshe nga 1 vit më parë, Shqipëria ka nisur të eksportojë në Spanjë edhe produkte kimike dhe plastike, edhe pse rritja në vlerë mbetet e vogël.

Veç Spanjës, në këtë periudhë Shqipëria ka njohur rritje të eksporteve dhe me Italinë me 9.6 % dhe me Kosovën 22.7 %.

Në të dyja rastet, është sërish zëri “minerale, lëndë djegëse dhe energji elektrike” ku rritja është e konsiderueshme.

Me Italinë, eksportet e kësaj kategorie janë rritur nga 1.5 miliard lekë në 3.95 miliard lekë. Ndërsa me Kosovën, eksportet e kësaj kategorie janë rritur nga 889 milion lekë në thuajse 2 miliard lekë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.