Gjeografia e Sigurimeve / AMF publikon statistikat. Rritet denduria për frymë e sigurimeve, Tirana zë vendin e parë si treg
Autoriteti i Mbikëqyrjes Financiare ka publikuar statiskat vjetore të Gjeografisë së Sigurimeve që pasqyron më mënyrë të detajuar shpërndarjen e primeve të shkruara bruto, dëmeve të paguara si edhe primit për frymë, sipas prefekturave.
Nga të dhënat vihet re një përqendrim i tregut të sigurimeve në prefekturat e mëdha, si Tirana me 59.63% të totalit të primeve të shkruara bruto gjatë vitit 2019, Durrësi me 7.51%, Fieri 5.29%, Shkodra 4.94%, Vlora 4.56%, Korça 4.72%.
“Kjo tendencë përqendrimi ka vijuar e tillë për një periudhë 12-vjeçare.” – shprehet AMF në njoftimin e saj.
Gjithashtu këtë vit ka një rritje të dendurisë të sigurimeve me rreth 275 lekë më shumë se viti i kaluar.
“Për vitin 2019 ky tregues është rreth 6,168 lekë për frymë, me një rritje rreth 275 lekë krahasuar me një vit më parë.”
Ndërkohë, përsa i përket primit për frymë sipas prefekturave, prefektura Tiranë me 11,551 lekë për frymë zë vendin e parë, e pasuar nga prefektura Gjirokastër me 5,962 lekë për frymë dhe më tej Durrësi me 4,535 lekë për frymë, Shkodra me 4,332 lekë për frymë dhe Vlora me 4,234 lekë për frymë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.