Gjermanët, jo dhe aq të përpiktë – Pasagjerët marrin 53 mln euro për vonesat e trenave
Kompensimet e operatorit më të madh të trenave në Gjermani, të paguara për vonesat e trenave, janë rritur nga 38.6 milionë euro në 2017-ën, në më shumë se 53 milionë euro vitin e kaluar.
Më shumë se 2.7 milionë pasagjerë të Deustche Bahn kanë marrë kompensim, në një mesatare prej 20 euro. Kjo po bëhet gjithnjë e më e dukshme, duke bërë kontradiktë me një vend, ku përpikëria në orar është një virtyt. Një në katër trena të operatorit shtetëror Deutsche Bahn, janë vonuar në vitin 2018. Kompania ka fajësuar kushtet ekstreme të motit si stuhitë, vetëtimat dhe verën e thatë. Grevat e sindikatave në Dhjetor kanë sjellë gjithashtu vonesa.
Çdo pasagjer i Deustche Bahn që mbërrin të paktën 1 orë me vonesë, mund të aplikojë për të marrë 25% të çmimit të biletës në kompensim dhe ata që mbërrin 2 orë me vonesë, mund të marrin mbrapsht gjysmën. Deutsche Bahn paguan pjesën më të madhe të kompensimeve në krahasim me kompanitë e tjera, pasi operon thuajse të gjitha linjat ndërurbane, që kanë zakonisht vonesa.
Parlamenti Europian ka bërë thirrje për një ndryshim të sistemit të kompensimeve, duke thënë se pasagjerët duhet të marrin gjysmën e çmimit të biletës pas një ore vonesë dhe të gjithë biletën nëse mbërrijnë me 2 orë vonesë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.