Gjermanët ngurrojnë të vaksinojnë fëmijët – Mjekët pediatër nuk nxitojnë pas miratimit të Pfizer për 5-11 vjeçarët
Mjekët pediatër në Gjermani nuk po nxitojnë të vaksinojnë fëmijët në moshë 5-11 vjeç, pasi rregullatori europian i barnave miratoi përdorimin e vaksinës së Pfizer/BioNtech për fëmijët. Agjencia Europiane e Barnave rekomandoi se vaksina e Pfizer me BioNTech të jepet si një injeksion në pjesën e sipërme të krahut në dy doza prej 10 mikrogramë, 3 javë nga njëra tjetra. Doza për të rriturit përmban 30 mikrogramë.
“Infeksionet me koronavirus shumë rralë rezultojnë në sëmundje tek fëmijët dhe ato kanë shumë pak gjasa të kenë sëmundje serioze apo simptoma që zgjasin, si ç’është Covidi i gjatë”- tha mjeku pediatër në Berlin, Jakob Maske. Më herët gjatë Javës, Organizata Botërore e Shëndetësisë theksoi se fëmijët dhe adoleshentët janë në rrezik më të ulët të sëmundjes së ashpër dhe se vendet duhet t’i japin prioritet të rriturve dhe të ndajnë vaksinat me programin COVAX, për të imunizuar edhe vendet e varfëra.
Në Mynih, mjeku Steffen Rabe, tha për Reuters se të dhëna të besueshme kanë treguar se fëmijët luajnë një rol të vogël në transmetimin e Covid-19, ç’ka bie ndesh me kuptimet në fillim të pandemisë. Ndërkohë që miratimi përfundimtar i vaksinës së Pfizer/BioNTech për fëmijët i takon Komisionit Europian, institucioni zakonisht ndjek rekomandimet e agjencisë.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.