Gjermania do “ndalet” – I papërsëritshëm vrulli i T1, por ekonomia në “formë”
Ekonomia gjermane do ta humbasë vrullin e tremujorit të parë të këtij viti gjatë muajve në vijim, deklaroi Ministria e Financave në vend, në një raport të publikuar këtë të Hënë.
Ekonomia më e madhe e Eurozonës u rrit me 1.9% gjatë vitit të kaluar, që është edhe norma më e lartë në 5 vite, duke marrë shtysë nga konsumi i lartë privat, shpenzimet shtetërore dhe aktiviteti i ndërtimit.
Gjatë tre muajve të parë të këtij viti ndërkohë, ekonomia gjermane rriti shpejtësinë, me një normë rritje në 0.6%, nga 0.4% të tremujorit të fundit të 2016-ës.
“Kushtet e favorshme makroekonomike, si perspektiva e shitjeve brenda dhe jashtë vendit, normat e ulëta të interesit dhe çmimet e moderuara të energjisë sinjalizojnë se, vrulli i ekonomisë do të vijojë edhe përgjatë këtij viti, pavarësisht se, me një hap më të ngadaltë se ai i tremujorit të parë”, thuhet në raportin e ministrisë gjermane të financave.
Institucioni ka mbajtur të pandryshuara projeksionet për rritjen ekonomike gjatë këtij viti dhe atij të ardhshëm, në 1.5 dhe 1.6% respektivisht.
Të gjitha këto të dhëna sinjalizojnë se, Wolfgang Schaeuble mund të vijojë me politikën e tij të njohur për një bilanc zero.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.