Gjermania kërkon rritje normash – Weidmann: E pashmangshme që të kemi një rritje graduale

Banka Qendrore Europiane është drejt rrugës së një politike monetare më pak ekspansive, ndërkohë që inflacioni i projektuar në 1.7% është në linjë me objektivat afat-mesëm të bankës, deklaroi  kreu i Bankës Qendrore të Gjermanisë, njëkohësisht anëtar i bordit drejtues të BQE, Jens Weidmann.

Ky i fundit është edhe një ndër kandidatët potencial për të pasuar Mario Draghin në krye të institucionit qendror të politikave monetare të eurozonës. Mario Draghit i skadon mandati në Tetor të vitit të ardhshëm.

Tashmë që banka qendrore ka ndryshuar kurs, normat e interesit do të rriten gradualisht, deklaroi Weidmann. “Pas vendimmarrjes së fundit, një normalizim i politikave monetare është i parashikueshëm”, nënvizoi ai. “Nga këndvështrimi aktual, ky proces do të jetë gradual dhe do të kërkojë kohën e nevojshme”, shtoi ai.

Banka Qendrore Europiane vendosi në muajin qershor që t`i japë fund programit të stimujve prej 2.6 trilionë dollarësh, brenda fundit të këtij viti, por shtoi se, normat e interesit do të mbeten të pandryshuara të paktën deri në verën e ardhshme. Gjermania ndërkohë, njihet gjerësisht si një prej kritikëve më të ashpra të politikave lehtësuese të Bankës Qendrore Europiane.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.