Gjermania kritikon planin e klimës së BE / Shoqata e prodhuesve të makinave thotë se nuk është neutral ndaj teknologjisë
Shoqata gjermane e industrisë së makinave (VDA) ka kritikuar planin klimatik të Bashkimit Europian, duke mos e quajtur “neutral” nga ana e teknologjisë. Kurt Christian Scheel, drejtori i shoqatës, tha se plani nuk është i hapur për të gjithë teknologjitë që sjellin neutralitet të klimës, por është përqendruar më shumë tek lëvizja elektrike. Sipas tij, prodhuesit gjermanë të makinave synojnë të arrijnë neutralitetin ndaj karbonit deri në vitin 2050, por do të preferonin një mënyrë ndryshe nga ajo e BE. “Ne përkrahim një qasje që është e hapur ndaj të gjithë teknologjive”- tha Scheel. Organizata për Lehtësim Mjedisor në Gjermani, e njohur si Deutsche Umwelthilfe (DUH) , ka kritikuar gjithashtu planin e klimës së BE, por në një këndvështrim të kundërt. Dorothee Saar, shefe e organizatës, tha se plani klimatik i BE është një hap i rëndësishëm përpara, por jo mjaftueshëm për të arritur objektivat e klimës së rënë dakrod në marrëveshjen e Parisit.
Politikëbërësit europian prezantuan këtë javë planin më ambicioz deri më tani për të luftuar ndryshimin klimatik, që do të kthejë objektivat e gjelbër në veprime konkrete këtë dekadë dhe do krijojë shembull për të gjithë botën. Komisioni Europian prezantoi me detaje se si 27 vendet mund të arrijnë objektivat kolektive për të ulur emetimet e gazrave serë me 55% nga nivelet e vitit 1990, deri në 2030-n, çka do ndihmojë në emetimet zero deri në 2050-n. Kjo do të sjellë rritjen e kostos së emetimit të karbonit për ngrohje, transport dhe manifakturë; taksimin e karburantit të aviacionit dhe të transportit në det, që nuk janë taksuar më parë, si dhe tarifimin e importuesve në kufij për emetimin e karbonit në produkte si çimento, çeliku dhe alumini.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.