Gjermania mund të bllokojë naftën ruse – Pavarësia ndaj energjisë ruse, që mbulon 40% të nevojave, prioritet, por kërkon kohë
Gjermania mund t’i japë fund importeve të naftës nga rusia, deklaroi Kancelari Olaf Scholz, duke sinjalizuar urgjencën që e shtyn ekonominë më të madhe të Europës të heqë dorë nga energjia ruse, pas pushtimit të Ukrainës.
Gjermania po punon në mënyrë aktive për të hequr varësinë ndaj importit të naftës ruse dhe mendohet se do të jetë në gjendje për ta arritur këtë gjatë këtij viti, shprehet Scholz gjatë një konference për shtyp në Londër me kryeministrin britanik Boris Johnson.
Bashkimi Europian miratoi këtë javë sanksione të reja ndaj Rusisë duke përfshirë ndalimin e importeve të qymyrit duke filluar nga gushti. Gjermania ka intensifikuar përpjekjet për të reduktuar ekspozimin e saj ndaj importeve ruse të energjisë pas pushtimit rus të Ukrainës më 24 Shkurt.
Aktualisht nafta ruse tani përbën 25% të importeve gjermane, nga 35% që ishte pushtimit dhe importet e gazit janë ulur gjithashtu me 10%, kurse importet e qymyrit u ulën në 25% nga 50% para pushtimit.
Ndalimi i importeve të gazit Rus është më i vështirë për Gjermaninë, që në tre-mujorin e parë mori 40% të dërgesave nga Rusia.
Gjermania po tenton të ulë pjesën e gazit rus në 24% deri në këtë verë, por mund të duhet deri në verën e vitit 2024 që t’i japë fund varësisë.
Gjermania mund të jetë në gjendje të sigurojë furnizime të mjaftueshme me gaz për dimrin e ardhshëm pa ndonjë import nga Rusia, por përmes një kombinimi të furnizuesve alternativë dhe masave drastike të kursimit të energjisë, sipas një studimi të Institutit Ekonomik Gjerman.
Norvegjia dhe Holanda mund të mbushin një pjesë të mangësive të mbetura nga ndalimi i importeve të gazit rus dhe më shumë furnizime mund të sigurohen përmes dërgesave të Gazit të Lëngshëm Natyror në terminalet në Belgjikë, Holandë dhe Francë, theksohej në studim.
Blerta Lata / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.