Gjermania, në kapacitet të plotë – Ekonomia rritet me 2.3% në T3, tregtia jep kontribut për periudhën
Ekonomia gjermane ka rifituar vrull në tremujorin e tretë dhe është drejt performancës më të mirë vjetore që prej vitit 2011. Produkti i Brendshëm Bruto u rrit me 0.8% gjatë periudhës sipër normës së tremujorit të dytë dhe duke thyer projeksionet për një rritje me 0.6%.
Me bazë vjetore, rritja shënoi 2.3% në tremujorin e tretë. Këtë herë, rritja ekonomike morri nxitje nga eksportet dhe investimet kapitale, duke bërë që tregtia neto të japë kontribut pozitiv. Të dhënat konfirmojnë projeksionet e Bundesbank se ekonomia do të jetë e fortë në gjysmën e dytë të vitit. Fuqizimi i Gjermanisë po nxit rimëkëmbjen e bllokut të valutës së përbashkët.
Euro u rrit me publikimin e të dhënave, duke u tregtuar në rritje me 0.2% në 1.1706 kundër dollarit. Zyra Federale e Statistikave rishikoi gjithashtu tremujorin e katërt, duke pritur një rritje me 0.9%, nga 0.7% që vlerësonte më parë. Ndërkohë që Gjermania ka qenë prej kohësh motori i rritjes së Eurozonës, falë kërkesës së fortë brenda vendit dhe eksporteve të mëdha, pjesa tjetër e rajonit po përshpejtohet gjithashtu.
Diferenca në normat e rritjes mes vendeve anëtare janë tkurrur në nivelin më të ulët në historinë e rajonit dhe Komisioni Europian deklaroi javën e kaluar se Eurozona do të rritet me normën më të shpejtë në një dekadë në 2017-ën. Banka Qendrore Europiane po merr meritat për rimëkëmbjen e ekonomisë, pas papunësisë dhe deflacionit që erdhën prej krizës së borxhit sovran, që kërcënuan mbijetesën e unionit të valutës.
Të dhënat do të priten pozitivisht edhe nga Kancelarja Angela Merkel, ndërkohë që blloku i saj konservator përpiqet të formojë një koalicion me demokratët e lirë dhe të gjelbrit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.