Gjermania nuk do të mbyllet sërish. Ministri i shëndetësisë përjashton karantinën kombëtare në Dimër

Gjermania nuk do të ketë nevojë për një tjetër karantinë kombëtare gjatë Dimrit për të mbajtur nën kontroll koronavirusin, pavarësisht rritjes së numrit të infeksioneve, sipas ministrit të Shëndetësisë, Jens Spahn.  Pasi mbajti normën e infeksioneve dhe vdekjeve relativisht të ulët, krahasuar me vendet fqinje në Europë, numri i rasteve të reja në gjermani është përshpejtuar në javët e fundit, duke rritur shqetësimin për një valë të dytë.

Spahn tha se ekspertët dhe politikanët po mësojnë çdo ditë më shumë mbi virusin.  Ndërkohë që karantina në muajin Mars ishte gjëja e duhur për të bërë atëherë,  sipas tij, nuk do të nevojitet më.   “Nuk do kemi nevojë për karantinë në rang kombëtar. Mund ta kalojmë me besim dimrin dhe vjeshtën”,- tha ai, duke shtuar se autoritetet rajonale mund të trajtojnë vatrat. Spahn tha se nuk do të ketë nevojë për të ndaluar vizitat në azile dhe situata në dyqane është nën kontroll me masa të distancimit dhe maska.  Ai shtoi se njerëzit duhet të vazhdojnë të kenë kujdes, duke larë duart dhe veshur maska.  Kancelarja Angela Merkel paralajmëroi javën e kaluar se situata me shumë mundësi do të përkeqësohet gjatë Dimrit.

Pavarësisht përpjekjes për të mbajtur ekonominë dhe shkollat e hapura, Merkel ra dakord me liderët rajonalë që të ndalojë eventet e mëdha deri në fund të vitit, si dhe të ashpërsojë rregullat ndaj udhëtuesve që kthehen nga vendet me rrezik të lartë.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.