Gjermania nxit Eurozonën – Sektori privat më në formë se asnjëherë në 6 vite
Rritja e sektorit privat në Gjermani ka rifituar vrullin gjatë Shkurtit, duke prekur kështu nivelin më të lartë në 3 vitet e fundit, çka sinjalizon edhe një rritje ekonomike më të fortë për ekonominë më të madhe të Europës gjatë tremujorit të parë.
Indeksi PMI i Markit, që është ndër matësit më të saktë të aktivitetit ekonomik, fiksohet gjatë muajit në 56.1 pikë, nga 54.8 pikë që regjistrohej në muajin Janar.
Ky indeks mat aktivitetin në sektorin e manifakturës dhe atë të shërbimeve. Niveli i 50 pikëve ndan rritjen nga kontraktimi.
Leximi i Shkurtit është gjithashtu mbi pritshmëritë e tregjeve, që flisnin për një nivel në 54.7 pikë. Sipas ekspertëve, këto të dhëna sinjalizojnë se, ekonomia gjermane do të rritet me 0.6% gjatë tremujorit të parë të vitit, ndërkohë që në tremujorin e fundit të 2016-ës rritej me vetëm 0.4%.
Nën-indikatori i sektorit të manifakturës u ngjit në 57 pikë, që është edhe niveli më i lartë në 6 vite. Ai i sektorit privat ndërkohë u ngjit në 54.4 pikë.
Nën-indikatori i çmimeve, tregon se, këto të fundit janë rritur me hapin më të shpejtë që prej vitit 2011. Gjermania duket se ka udhëhequr të gjithë eurozonën drejt një performance të shkëlqyer.
Indeksi PMI për eurozonën u ngjit në 56 pikë gajtë shkrutit, që është niveli më i lartë që prej 2011-ës. Krijimi i vendeve të reja të punës ndërkohë është në hapin më të shpejtë që prej 2007-ës.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.