Gjermania përgatitet për Omicron – Soeder: Duhet një strategji kombëtare. Varianti mund të përmbysë situatën
Autoritetet federale dhe rajonale të Gjermanisë, ranë dakord të ndërmarrin aksion për të luftuar valën e katërt të pandemisë, duke i dhënë vrull fushatës së vaksinimit dhe shtuar kufizimet sociale, veçanërisht për të pavaksinuarit.
Kancelarja që po largohet, Angela Merkel, përballë presioneve nga rritja e rasteve, ka zhvilluar bisedime me pasardhësin Olaf Scholz, si dhe liderët rajonalë. Lideri i Bavarisë, Markus Soeder, tha se duhet të ketë një strategji kombëtare dhe se varianti i ri Omicron, mund të ndryshojë perspektivën.
Përballë kritikave nga shkencëtarët se kanë vepruar shumë vonë, liderët ranë dakord të ndërmarrin vendime ndaj propozimeve, si detyrimi i klientëve që të tregojnë prova të vaksinimit apo shërimit në dyqane, si dhe kufizimin e numrit të njerëzve në eventet e mëdha. Liderët do të vendosin gjithashtu nëse do të ndalojnë fansat e futbollit nga ndeshjet e Bundesligës.
Lideri social demokrat Scholz, që pritet të zëvëndësojë konservatoren Merkel në javën e ardhshme, tha se do synojë miratim në parlament për vaksinimin e detyruar. Gjykata kushtetuese e Gjermanisë vendosi më herët se karantinat e mëparshme nuk kanë shkelur të drejtat e fëmijëve për t’u shkolluar, apo liri të tjera më kushtetutë, duke i dhënë qeverisë më shumë liri për të vendosur masat.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.