Gjermania pritet të humbasë vrull – Ministria e Financave deklaron se ekonomia do të ngadalësohet në tremujorin e parë
Rritja e ekonomisë gjermane mund të ngadalësohet lehtë në tremujorin e parë, megjithatë trendi pozitiv i ekonomisë më të madhe të Europës vazhdon, falë kërkesës së fortë brenda dhe jashtë vendit.
Ekonomia gjermane, që u rrit me 0.6% në tremujorin e fundit të 2017-ës nga i treti, ndodhet në një rimëkëmbje të kryesuar nga konsumi. Investimet e kompanive dhe eksportet janë shtuar së fundmi si nxitës të rritjes.
“Treguesit ekonomik kanë sinjalizuar një ngadalësim në dinamikat e rritjes së Produktit të Brendshëm Bruto në nisje të këtij viti”, deklaroi Ministria e Financave në raportin mujor, duke theksuar dobësimin e prodhimit industrial në nisje të vitit.
Megjithatë, rimëkëmbja ekonomike qëndron e fortë dhe është e mbështetur gjerësisht si nga faktorë të brendshëm edhe të jashtëm.
Nga Janari në Mars, të ardhurat tatimore nga qeveria federale dhe 16 shtetet rajonale u rritën me 4.1% me bazë vjetore, sipas ministrisë së Financave. Qeveria gjermane do të përditësojë projeksionet për rritjen ekonomike në 2018-ën gjatë javës së ardhshme.
Në Janar, projektoi se produkti i brendshëm bruto do të rritet me 2.4% këtë vit. Institucionet kryesore gjermane bënë të ditur këtë të Enjte se ekonomia do të rritet me 2.2% këtë vit dhe 2% në 2019-ën.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.