Gjermania racionon gazin – Industria përgatitet për ndërprerjen e gazit rus!

Bizneset e mëdha në Gjermani po përgatisin një plan për të përdorur një sistem ankandi që do të ndihmonte në racionimin e rezervave aktuale në rast se do të ndërpritet furnizimi me gazin rus, me frikën se situara do të rëndojë më shumë në kompanitë e vogla.

Diskutimet për një racionim të mundshëm janë bërë gjithnjë e më të shpeshta pasi Rusia ndërpreu furnizimin për Bullgarinë dhe Poloninë muajin e kaluar.

Shqetësimet se një gjë e tillë mund t’i ndodhë dhe Gjermanisë, e cila është shumë e varur nga gazi rus, lidhen me afrimin e afatit të pagesës për këtë muaj, të cilën Moska këmbëngul se e do në rubla.

Si për të shtuar dhe më shumë tensionet, furnizuesi shtetëror energjitik i Finlandës, Gasum, u shpreh se Rusia mund të ndërpresë furnizimet për vendin këtë javë, pasi Helsinki vendosi t’i japë fund dekadave të tëra neutraliteti duke kërkuar anëtarësimin në NATO. Një gjë që Moska e kundërshton me ngulm.

Plani i veprimit i përgatitur nga BNETZA në Gjermani, e cila do të ketë detyrën e racionimit të rezervave të gazit në situatë emergjence, analizon se cilat kompani do të kenë prioritet. Një nga pikat e këtij plani tregon qartë se duke pasur parasysh seriozitetin e situatës, mund të jetë e nevojshme që disa përdoruesve t’u ndërpritet fare furnizimi me gaz.

Rregullatorët mund të shtyjnë ndërprerjen e furnizimit me gaz për industrinë nëse agjencia vendos se një kompani ka një rol të jashtëzakonshëm, por gjithësesi detajet janë ende të paqarta. Presidenti i BNETZA saktësoi se do të merren parasysh disa kritere për të vendosur racionimin e gazit për industrinë, përfshirë këtu madhësinë e kompanisë, rëndësinë e sektorit dhe humbjet e mundshme ekonomike

Industria gjermane është në ankth për sa i përket fabrikave të cilat shpenzojnë shumë energji, si ajo e qelqit, hekurit, ushqimit apo ilacebe, por dhe sektori i produkteve kimike që siguron pjesën më të madhe të blloqeve ndërtuese për industrinë. Disa nga këto industri u shprehën se rregullatori do e ketë të vështirë të hartojë një listë racionimi koherente, sepse zinxhiri i furnizimit është i ndërthurur në një mënyrë të tillë sa është e vështirë të parashikohen pasojat.

Në përpjekje për të marrë situatën nën kontroll, propozimet nga Federata Gjermane e Industrisë, të cilat do të publikohen në fillim të muajit qershor, mbështesin idenë e një sistemi të stilit ankand.

Shteti gjerman do të rimbursojë kompanitë nëse ndërprerja e furnizimit me gaz do t’u shkaktojë atyre ndalimin e prodhimit, në mënyrë të përkohshme apo për një periudhë afatgjatë. Një tjetër ide është shpërndarja e gazit në bazë të cmimit, por detajet e këtij plani janë ende në përpunim.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.