Gjermania rrezikon përsëri recesionin – Tremujori i katërt, në stanjacion. Ndikojnë konsumi privat dhe shtetëror
Ekonomia gjermane regjistroi një stanjacion në tremujorin e katërt, ndërkohë që konsumi privat dhe shpenzimet shtetërore humbën vrull, duke rritur shqetësimet për recesion. Ekonomia më e madhe e Europës është ngadalësuar ndërkohë që sektori i manifakturës po goditet nga rënia e eksporteve, sfidat e prodhuesve të makinave me tranzicionin elektrik dhe lufta tregtare mes Kinës dhe Shteteve të Bashkuara.
Konsumi privat dhe shpenzimet shtetërore kishin ofruar vrull gjatë kohëve të fundit dhe nëse këto dy sektorë vazhdojë të ngadalësohen këtë vit, pritet të rritet rreziku i recesionit. Ekonomistët thonë se shanset për një recesion në gjysmën e parë të vitit janë të larta. Për tremujorin e tretë, rritja ekonomike u rishikua në 0.2% nga 0.1%. Zyra Federale e Statistikave bëri të ditur se investimet në sektorin e ndërtimit u rritën në tremujorin e katërt, ndërsa shpenzimet në makineri dhe pajisje ranë në mënyrë të ndjeshme krahasuar me tremujorin e tretë.
Eksportet pësuan gjithashtu një ngadalësim në fundvit. Qeveria e kancelares Angela Merkel i ka rezistuar thirrjeve për stimuj fiskalë, që të mbështesin ekonominë. Këto thirrje pritet të bëhen më të mëdha nëse ekonomia vazhdon të humbasë vrull. Me bazë vjetore, Produkti i Brendshëm Bruto në Gjermani u rrit me 0.4% në tremujorin e fundit, nga 0.6% që ishte norma e tremujorit të tretë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.