Gjermania vazhdon zgjerimin – Rritja ekonomike “gëlon” falë faktorëve të brendshëm

Të gjithë sektorët e ekonomisë gjermane u regjistruan në rritje gjatë tremujorit të dytë të vitit, tregojnë të dhënat më të fundit. Investimet private, shpenzimet shtetërore dhe konsumi privat u rritën ndjeshëm gjatë periudhës prill-qershor, duke sinjalizuar kështu se rritja ekonomike gjatë kësaj periudhe kohore fiksohet në 0.5%.

Të dhënat tregojnë se, ekonomia më e madhe e Europës do të jetë në gjendje të përballojë tensionet tregtare. Investimet në ndërtim dhe shpenzimet shtetërore njohën rritjen më të madhe gjatë kësaj periudhe kohore, duke u rritur me nga 0.6% respektivisht. Të dhënat tregojnë gjithashtu se, ekonomia më e madhe e Europës ka një varësi nga faktorët e brendshëm, në një kohë që eksportet vijojnë të dobësohen.

Konsumi privat regjistrohet në rritje për të 18-tin muaj me radhë. Zyra federale e statistikave tregon se, eksportet u rritën me 0.7% në terma tremujorësh ndërkohë që importet u rritën me 1.7%. Tregtia neto ka ulur me 0.4 pikë përqindje rritjen ekonomike.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.