Gjiknuri, mbi aksionin për ujin – “Janë grumbulluar rreth 7 milionë dollarë më shumë se 2017”
Aksioni për ujin ka dhënë rezultatet e para pozitive. Sipas Ministrit të Energjisë dhe Infrastrukturës, Damian Gjiknuri, gjatë muajve të parë të aksionit janë grumbulluar rreth 7 milionë dollar më shumë të ardhura nga një vit më parë. Po sipas tij, mungesa e bashkëpunimit në këtë aksion nga ana e bashkive, mund të sjellë edhe dështimin e tij.
“Kemi thënë punonjësit publikë që marrin rroga nga shteti, ata duhet të jenë të parët, siç paguajnë energjinë të paguajnë edhe faturën e ujit dhe ka një fluks, është shtuar të punonjësve të cilët i janë përgjigjur kësaj thirrje edhe shumë qytetarë të tjerë dhe jo vetëm ata. Faktikisht, disa të dhëna të para janë të mira dhe në mos gaboj vetëm periudhën e parë kemi një të ardhur prej 7 milionë e ca dollarë krahasuar me vitin e kaluar, pra në periudhën që s’ka pasur interes dhe sensibilizim që është diçka e mirë për të forcuar financiarisht sistemin. Ndërmarrjet e Ujësjellës Kanalizimeve i kanë bashkitë dhe shpesh herë bashkitë janë ato që bëjnë kompromise jo të dobishme për qytetarët por për interesa nga më të voglat dhe ky aksion mund të dështojë fatkeqësisht rrugës.”
Në shkurt ka nisur zyrtarisht aksioni i ujit në sektorin e biznesit, ndërkohë që familjeve u është dhënë një afat prej më shumë se tre muajsh për të formalizuar lidhjet në rrjet apo për të kryer lidhjet e reja.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.