Gjobat ndaj subjekteve minerare – Udhëzimi i Gjiknurit: Ankimim pranë AKSEM ose në gjykatë
Ministri i Infrastrukturës dhe Energjisë, Damian Gjiknuri ka përcaktuar procedurat që duhet të ndjekin subjektet minerare për të ankimuar gjobat e marra në shkelje të ligjit “Për sigurinë dhe shëndetin në punë”.
Sipas udhëzimit që mban datën 23 gusht 2018, subjekti ndaj të cilit vendoset masa administrative ka të drejtën e ankimit me shkrim pranë Komisionit të Shqyrtimit të Gjobave, i ngritur pranë Autoritetit Kombëtar për Sigurinë dhe Emergjencat në Miniera. Për të kundërshtuar masën administrative, subjekti duhet të vërtetojë datën e marrjes së aktit administrativ si dhe të bashkëngjisë një sërë dokumentesh siç mund të jenë raportet e kontrollit, procesverbalet e dokumente të tjerë që mund të ndihmojnë në zgjidhjen e drejtë të çështjes.
Referuar udhëzimit, Komisioni i Shqyrtimit të Gjobave duhet të shqyrtojë dokumenetet dhe të marrë një vendim brenda 15 ditësh nga dorëzimi i ankimimit. Ndërkohë që, në rast se subjekti minerar nuk do të jetë dakord me vendimin, ka të drejtë ta çojë çështjen në Gjykatën Administrative të Shkallës së Parë, brenda 45 ditësh.
Sipas të dhënave të Agjencisë Kombëtare të Burimeve Natyrore, aktualisht janë aktive mbi 600 leje minerare, ndërkohë që ky sektor është një nga më problematikën në drejtim të sigurisë dhe aksidenteve në vendin e punës.
Sipas të dhënave zyrtare të Inspektoratit Shtetëror të Punës, për vitin 2017 u regjistruan 35 aksidente, nga të cilët 7 me pasojë vdekjen. Ndërkohë që këto shifra rezultojnë pothuajse 2-fish më të larta në krahasim me një vit më parë , ku u shënuan 19 të tillë. Sipas Inspektoratit, ndaj 63 subjekteve janë vendosur dënime administrative kryesore, ku 26 prej tyre janë gjobitur për shkelje të rregullave të sigurisë në punë, apo mosnjoftim të aksidentit në punë. Ndërkohë që, 37 subjekte janë paralajmëruar për gjobë në rast të përsëritjes së shkeljes apo mosplotësim të detyrave të lëna në afatet respektive.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.