Gjobat për stacionet e ndërmjetme – Shoqatat e transportit, dakordësi me DPSHTRR: Pajisje me autorizim

Gjobitja e autobusëve për shkak të ndalesave në stacione të ndërmjetme nga Task-Forca e Transportit duket se do të marrë zgjidhje. Shoqatat që përfaqësojnë shoqëritë që operojnë në linjat interurbane thonë se kanë arritur dakordësi me Drejtorinë e Përgjithshme të Shërbimeve të Transportit Rrugor, duke përcaktuar pikat që do të shërbejnë për këtë qëllim.

Ndërkaq, për të përfituar të drejtën e përdorimit të këtyre stacioneve, shoqëritë që operojnë në këtë fushë duhet të pajisen me një autorizim, që do të lëshohet nga DPSHTRR, kundrejt një pagese, masa e së cilës nuk është vendosur ende.

Penalizimet për ndalesa në pika të paautorizuara varionin nga 25-100 mijë lekë, ndërkohë që tashmë drafti është drejt mbylljes dhe pritet nisja e punës për sistemimin e tyre nga ana e Autoritetit Rrugor Shqiptar.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.