Gjobë rekord për Google nga Bashkimi Europian – 5 miliardë dollarë për shkak të aplikacioneve në Android
Google do të ndëshkohet me një gjobë prej 4.34 miliardë eurosh (5 mld dollarë amerikanë) nga Bashkimi Europian konkurrencës në lidhje me aplikacionet në Android.
Gjoba u shpall nga Komisioni Europian mesditën e sotme dhe përmbylli hetimin e BE në kontratat e Google me prodhuesit e telefonëve dhe operatorët telefonikë.
Kjo masë thyen rekordin e mëparshëm të vendosur vitin e kaluar nga Komisioni Europian, për gjobën 2.4 miliardë euro ndaj Google për shërbimin e saj të kërkimit të blerjeve.
Por më e rëndësishme se gjoba mund të jetë detyrimi që kompania të zbrazë telefonët nga aplikacionet e parainstaluara dhe t’u japë mundësi prodhuesve të zgjedhin të instalojnë aplikacione jo të Google në aparatet Android. Kjo do të lironte jashtëzakonisht shumë terren për zhvilluesit e aplikacioneve, duke qenë se 80% e smartphone-ëve përdorin Android.
Zyrtarët e Bashkimit Europian kanë investiguar kontratat e Google, të cilat i detyrojnë prodhuesit e telefonave të përdorin aplikacionet e Google për kërkimin dhe lundrimin në internet, si edhe shërbime të tjera, kur ata kërkojnë të licencojnë aplikacionin Play store.
Nën shënjestrën e BE janë edhe pagesat e Google ndaj operatorëve të telefonisë celulare dhe prodhuesve të telefonave që instalojnë ekskluzivisht vetëm aplikacionet e Google në pajisjet e tyre.
Google zë një pjesë tregu prej 90% të kërkimeve në internet, sistemeve të licencuara të operimit dhe dyqaneve të aplikacioneve për Android.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.