Gjobiten 160 biznese për shkelje të kodit të punës/ Probleme me kushtet teknike, 79% për shkak aksidenti!

160 subjekte janë gjobitur gjatë vitit që lamë pas për shkak të shkeljeve të legjislacionit të punës. Sipas raportit vjetor të Inspektoriatit Shtetëror të Punës, nga këto masa administrative,  janë shqyrtuar nga Komisioni i Ankimit të Gjobave, 53 ankimime. 45 prej tyre janë lënë në fuqi dhe janë shfuqizuar 6 gjoba. Është ndryshuar vendimi për 1 subjekt për të cilin inspektorët kishin përcaktuar dënimin administrativ “Paralajmërim”.

Në të gjithë rastet për të cilat Komisioni i Ankimit të Gjobave, ka vendosur shfuqizim, u është dërguar rast pas rasti, tërheqje vëmendje inspektorëve, që kanë trajtuar këto praktika inspektuese, për zbatimin në mënyrë sa më rigoroze të legjislacionit të punës. Gjatë periudhës Janar-Dhjetor  2019, Inspektoriati Shtetëror i Punës dhe Shërbimeve Shoqërore ka realizuar  gjithsej 13.079 inspektime në subjekte Private dhe Shtetërore ose 782 inspektime më shumë se një vit më parë.

Në 27 % të inspektimeve të kryera janë vendosur masa administrative për shkeljet e konstatuara.  Përqindjen më të lartë të subjekteve me dënime administrative si paralajmërim, gjoba, pezullime) e zënë inspektimet për shkak aksidenti me 78.6% dhe inspektimet për shkak ankese me 48 %. Për vitin 2019 vlera e gjobave të arkëtuara në buxhetin e shtetit  rezulton në rreth 27 milionë lekë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.