Gjonaj ritakim me ambasadorin e Norvegjisë – Nënshkruhet ‘Memorandumi i mirëkuptimit’

Ministrja e Drejtësisë Etilda Gjonaj ka takuar me ambasadorin e Norvegjisë për Shqipërinë dhe Kosovën, Per Strand Sjaastad, në përfundim të misionit të tij në Shqipëri.

Sipas njoftimit, gjatë takimit, ambasadori shprehu vlerësime për rolin e Qeverisë Shqiptare dhe Ministrisë së Drejtësisë në zbatimin e reformës në drejtësi si edhe reformave të tjera, siç është ajo e përmirësimit të sistemit të ndërmjetësimit, me qëllim rritjen e alternativave për zgjidhjen e mosmarrëveshjeve midis palëve.

Nëpërmjet njoftimit në rrjetin social Gjonaj tha se shprehu mirënjohje për mbështetjen dhe bashkëpunimin në projektin e ri dy vjeçar me vlere rreth 600 mijë euro, që u konkretizua me nënshkrimin e marrëveshjes së mirëkuptimit në fushën e ndërmjetësimit, e cila konsiston në mbështetje me asistencë teknike dhe financiare.

Pas diskutimeve mbi disa nga objektivat dhe sfidat kyçe të MD, të dyja palët nënshkruan “Memorandumin e Mirëkuptimit” me qëllim bashkimin e përpjekjeve për zbatimin e projektit “Forcimi i Sistemit të Ndërmjetësimit në Shqipëri” i cili do të rrisë aksesin e qytetarëve në drejtësi. Gjithashtu, njoftimit bëri me dije se përmes kësaj iniciative synohet të jepen njohuri të mjaftueshme në mënyrë që ligji i ri për ndërmjetësim të jetë i zbatueshëm dhe i kuptueshëm nga aktorët kyç, për të nxitur më tej bashkëpunimin.

Megjithatë, qëndrimi pro hapjes së negociatave për Shqipërinë me Bashkimin Europian, ftesat për bashkëpunim, gatishmëria për të investuar, janë të tjera sinjale pozitive të takimit që sipas Gjonajt intensifikojnë më tej marrëdhëniet e Shqipërisë me Norvegjinë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.