Gjonaj u kërkon prokurorëve rezultate konkrete – Yuri Kim: Korrupsioni kërcënim i përbashkët për sigurinë, ktheni besimin te drejtësia
Në një tryezë më krerët e organeve të reja të drejtësisë, Ambasadorja Amerikane Yuri Kim e ka përkufizuar korrupsionin si kërcënim të përbashkët për sigurinë. Ajo ka kërkuar bashkëpunim të të gjitha institucioneve për të bërë të mundur luftimin e këtij fenomeni ashtu si dhe kthimin e besimit të publikut te drejtësia.
“Ju e dini, që ndjekja penale në luftën kundër krimit, nuk varet nga puna e vetëm një institucioni, fokusi ynë është punë e përbashkët dhe bashkëpunimi i këtyre institucioneve. Veprimet që kemi dëshmuar në javët, madje në vitin e fundit, që kur institucionet janë ngritur, kanë filluar që të krijojnë besimin e publikut. Në fakt, ngritja e këtyre institucioneve ka qenë një hap themelor i reformës në Drejtësi, sistemi është funksional, por nuk është ende në majë të performancës, për shkak të mungesës së personelit, apo mungesës së publikut. Muajin e kaluar, Biden e bëri të qartë që SHBA e konsiderojnë korrupsionin kërcënim për sigurinë kombëtare, jo vetëm të SHBA, por edhe të aleatëve, prandaj zgjeroi urdhrin e tij. Ai ka identifikuar sjellje të tjera të dënueshme, dhe e ka bërë urdhrin ekzekutiv ndaj një game të gjerë të këtyre personave në Ballkanin perëndimor, duhet të nxisë prokurorinë që të luftojë korrupsionin. Ulja e numrit të prokurorëve për shkak të Vetting, theksojnë nevojën e përshtatjes së vazhdueshme, ju nxis që të punoni së bashku për të gjetur mënyra më të mira për t’i trajtuar ato, SHBA do ju mbështesë për të ndërtuar një Shqipëri më të sigurt, më të begatë”, tha Kim.
Ministrja Etilda Gjonaj tha se sistemi i drejtësisë është reformuar tashmë rrënjësisht dhe është koha për rezultate konkrete nga ana e prokurorive.
Në konferencën “FORCIMI I DREJTËSISË PENALE NËPËRMJET BASHKËPUNIMIT TË NGUSHTË TË INSTITUCIONEVE TË DREJTËSISË” morën pjesë krerët e 5 organeve të reja.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.