Gjykata Europiane e të Drejtave të Njeriut dënon Poloninë – Kërkon reformimin e sistemit të saj gjyqësor
Polonia është dënuar nga Gjykata Evropiane e të Drejtave të Njeriut (GJEDNJ) për reformimin e sistemit të saj gjyqësor.
Gjykata i bëri thirrje Varshavës që të ndërmarrë “veprim të shpejtë” për të zgjidhur mungesën e pavarësisë në Këshillin e saj Kombëtar.
Vendimi kishte të bënte me dy gjyqtarë të cilët ishin ankuar se të drejtat e tyre ishin shkelur kur ishin refuzuar për pozita gjyqësore. Polonia është përfshirë në një mosmarrëveshje me Bashkimin Evropian për sundimin e ligjit dhe pavarësinë e gjyqësorit.
Polemika ka të bëjë me Dhomën e re të Kontrollit të Jashtëzakonshëm dhe Çështjeve Publike të Gjykatës së Lartë Polake, e cila u krijua në 2017 për të emëruar gjyqtarë.
Qeveria e Polonisë tha se reformat ishin të nevojshme për të çliruar sistemin gjyqësor nga komunizmi, por kritikët thonë se dhoma kufizon pavarësinë e gjykatave polake.
Pasi u gjobit me 1 milion euro në ditë nga Gjykata Evropiane e Drejtësisë, Polonia ka thënë se do të heqë dhomën disiplinore. GJEDNJ thotë se ata kanë marrë 57 ankesa që nga viti 2018 në lidhje me reformat gjyqësore polake.
Në rastin e fundit, dy gjyqtarë, Monika Joanna Dolinska-Ficek dhe Artur Ozimek, ishin ankuar për mungesën e paanësisë dhe pavarësisë së gjykatës polake.
Ata të dy kishin aplikuar për poste gjyqësore, por nuk u rekomanduan dhe ankesat e tyre në Gjykatën e Lartë u refuzuan në vitin 2019.
GJEDNJ vendosi njëzëri se Polonia kishte shkelur të drejtën e gjyqtarëve për një gjykim të drejtë.
“Procedura për emërimin e gjyqtarëve u ndikua në mënyrë të padrejtë nga degët legjislative dhe ekzekutive,” vendosën shtatë gjyqtarët.
“Kjo ishte një parregullsi thelbësore që minoi të gjithë procesin,” konstatoi gjykata, duke shtuar se dhoma nuk ishte një “tribunal i krijuar me ligj”.
Gjykata deklaroi se Polonia duhej të merrte “veprime të shpejta korrigjuese” për të trajtuar mungesën e pavarësisë në gjyqësorin e saj.
Varshava u urdhërua gjithashtu të paguajë 15,000 euro për secilin prej gjyqtarëve për dëmshpërblim jomaterial.
Zëvendësministri i Drejtësisë i Polonisë, Sebastian Kaleta, kritikoi vendimin në Twitter dhe akuzoi gjykatën për shënjestrimin e padrejtë të Polonisë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.