Gjykata hungareze refuzon të ekstradojë Gruevskin
Gjykata komunale e Budapestit hodhi poshtë kërkesën e Maqedonisë së Veriut për ekstradimin e ish Kryeministrit Nikola Gruevski , duke thënë se një personi që i është dhënë azili nuk mund të kthehet në vendin nga i cili është arratisur. Zyra e Emigracionit dhe Azilit Hungarez i pati dhënë atij të drejtën e azilit në vitin 2018.
Gruevski, i cili dha dorëheqjen më 2016 pas një dekade në pushtet, u lirua nga paraburgimi me urdhër të gjykatës, bën me dije media hungareze MTI. Policia maqedonase kishte lëshuar një urdhër arresti për Gruevskin, pasi ai dështoi të paraqitej në gjykatë për fillimin e çështjes së tij në Maqedoni, sikurse njihej shteti asokohe përpara se të ndryshonte emër në Maqedoninë e Veriut këtë vit.
Shefi i kabinetit të qeverisë së kryeministrit Viktor Orban, Gergely Gulyás, tha në një konferencë shtypi se qeveria e respektoi vendimin e gjykatës hungareze mbi ekstradimin.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.