Gjykata shtyn vendimin për HEC-et mbi Valbonë – Vendoset më datë 3 Nëntor
Gjykata Administrative e Tiranës duhej të jepte ditën e mërkurë vendimin e saj nëse do të anulonte ose jo kontratat koncesionare për ndërtimin e dy hidrocentraleve mbi lumin e Valbonës, por ka vendosur ta shtyjë këtë vendim deri më datë 3 Nëntor.
Gjykata shprehet se ka marrë një vendim, por për të përgatitur vendimin e arsyetuar do të duhet kohë, ndaj është vendosur të shtyhet për seancën tjetër.
Banorët nga zona ku po ndërtohen këto hidrocentrale dhe shoqata “Toka” kanë paditur institucionet shtetërore si Ministrinë e Energjisë, atë të Mjedisit, Agjencinë Kombëtare të Mjedisit, Këshillin Kombëtar të Territorit dhe Agjencinë e Zhvillimit të Territorit. Sipas palës paditëse, këto institucione nuk kanë marrë masat e nevojshme për të zbatuar vendimin e qershorit të këtij viti të gjykatës administrative, e cila ndalon një prej kompanive të vazhdojë punimet për ndërtimin e hidreocentraleve.
Nga paditësit kërkohet gjitahstu shpallja e pavlefshme e kontratës së vitit 2009 mes shoqërisë “Gener 2” dhe Ministrisë së Energjisë.
Shqetësimi kryesor i shoqatave ambientaliste dhe banorëve të zonës është mundësia se edhe një HEC-i të vetëm, do të dëmtonte në mënyrë të pariparueshme Luginën e Valbonës dhe turizmin në këtë zonë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.