Gjyqësori boshatiset nga Vetting-u – KLGJ komandon mbi 100 gjyqtarë për të plotësuar trupat e përkohshme
Një numër i madh dosjesh penale që rrezikojnë shkeljen e afateve proceduriale ka detyruar Këshillin e Lartë Gjyqësor të komandojë 106 gjykatës nëpër gjykata të ndryshme për t’i dhënë zgjidhje emergjencës.
Shkak është bërë boshatisja e gjykatave për shkak të shkarkimeve nga Vetting-u e nga dorëheqjet. Për këtë shkak, disa gjykata nuk kanë numrin e domosdoshëm të gjyqtarëve për të ngritur trupat përkatëse për të marrë në shqyrtim as dosjet më emergjence me limite kohore.
Vendimi për caktimin e përkohshëm të një numri kaq të lartë gjykatësish u bë me qëllim gjykimin e dosjeve brenda afateve që parashikon ligji, pasi në të kundërt shkeljet proceduriale mund të shfrytëzohen nga palët në proces për të bërë nul vendimin në rastet e dënimeve penale
Gjithsesi, kjo masë drastike do arrijë të zgjidhë vetëm përkohësisht emergjencat e momentit., ndërkohë që gjendja pritet të përkeqësohet edhe më tej me vijimin e shkarkimeve nga procesi i Vetting-ut.
Pas Gjykatës së Lartë e asaj Kushtetuese, ishin apelet ato që pësuan ulje drastike të numrit të gjyqtarëve, por tani efekti i shkarkimeve po nis të ndihet edhe në gjykatat e shkallëve më të ulëta.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.