Gjyqi për shkarkimin e Trump/ Demokratët thonë se ai ka abuzuar me detyrën për fuqizim politik!
Demokratët bashkëpunuan në mënyrë metodike në gjyqin e shkarkimit të Donald Trump, për të hedhur poshtë dyshimet e presidentit se garuesi demokrat Joe Biden ka vepruar në mënyrë të gabuar kundrejt Ukrainës.
Në ditën e dytë të gjyqit, anëtarët e Dhomës së Përfaqësuesve argumentuan se Biden nuk ka bërë asgjë gabim dhe po vepronte sipas politikave amerikane kur i bëri presion Ukrainës që të shkarkojë kryeprokurorin, Victor Shokin, për shkak të korrupsionit.
Trump dhe aleatët e tij thanë se Biden kërkonte largimin e kryeprokurorit, në mënyrë që të ndalohej hetimi i kompanisë së gazit, Burisma, ku djali i Biden ishte drejtor.
Demokratët thonë se nuk ka prova për ta mbështetur këtë akuzë. Demokratët u përqendruan në seancën e dytë tek akuza se Trump ka abuzuar detyrën e tij për t’i bërë presion Ukrainës, që të hetojë Biden për favore politike.
Sipas tyre, Trump kërkoi këtë hetim për shkak se i frikësohej garës me Joe Biden në muajin Nëntor. Demokratët thonë se Trump duhet të dënohet prej 2 akuzave të nxjerra nga Dhoma e Përfaqësuesve; abuzimi i detyrës dhe pengimi i hetimeve në Kongres.
Megjithatë, Senati që kontrollohet nga republikanët e Trump, nuk bie dakord për këtë. Trump i quajti seancat si të padrejta dhe të korruptuara.
Akuzat kundër Trump erdhen prej kërkesës së tij në një telefonatë më 25 Korrik 2019, që Ukraina të hetojë Biden për dyshime të korrupsionit dhe prej veprimeve të presidentit për të penguar hetimet në Kongres.
Trump ka bllokuar 391 milionë dollarë ndihma të ushtrisë amerikane ndaj Ukrainës, në mënyrë që të zbatohej kërkesa e tij.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.