Gjyqtarët në pritje të shkarkimit – Bum aplikimesh, i paraprijnë Vetting-ut dhe regjistrohen në kursin për avokatë
Një numër i konsiderueshëm gjyqtarësh të cilët e dinë që zor se do t’i mbijetojnë sitës së Vetting-ut kanë nxituar të aplikojnë për licencë avokati.
Sipas informacioneve të marra nga TV Scan pranë Dhomës Kombëtare të Avokatisë, të paktën 50 magjistratë kanë aplikuar së fundmi për të ndjekur kursin e nevojshëm për të marrë licencën për të ushtruar këtë profesion.
Ndërkohë që një numër i konsiderueshëm i magjistratëve të shkarkuar nga Vetting-u, të cilët i kanë pasur licencat prej kohësh, kanë nxituar t’i rikthehen profesionit të dikurshëm. Sicc qe rasti i ish kreut të njërës prej gjykatave kryesore në vend, i cili vetëm pak ditë pas shkarkimit nga Apeli i Vetting-ut, kishte nxituar për të riaktivizuar licencën dhe tashmë vijon me kohë të plotë profesionin e avokatit.
Gjyqtarët që e dinë se nuk e kalojnë dot sitën e Vetting-ut, konsiderohen nga ekspertët edhe si një prej problemeve kryesore me të cilat përballet aktualisht drejtësia shqiptare. Sipas tyre, kjo kategori magjistratësh, po e shfrytëzon periudhën deri te dalja para togave të zeza të Vetting-ut për të fituar ç’të munden.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.