Gjyqtari i dënuar në Itali – Thanza, probleme me pasurinë, korrupsionin, lidhjet me krimin
Ka zgjatur në mënyrë të pazakontë për më shumë se dy orë seanca dëgjimore e Vetting-ut ndaj anëtarit të Gjykatës së Lartë Admir Thanza. I pazakontë ka qenë edhe lumi i akuzave të ngritura nga Komisioni i Pavarur i Kualifikimit, më të cilat është përballur Gjyqtari. Ato nisën nga deklarimi i rremë i pasurisë, te kontakte të dyshimta me njerëz të lidhur me botën e krimit, te fshehja e një procedimi penal të nisur ndaj tij, e deri te një dënim për vjedhje në Itali, i zbuluar nga Operacioni Ndërkombëtar i Monitorimit, i njohur ndryshe si ONM. Ndërkohë që edhe raportet e ILDKPI-së, DSIK-e dhe Këshillit të Lartë të Drejtësisë e kishin përkufizuar Thanzën si person me probleme me pasurinë, me pastërtinë e figurës, por edhe me performancën profesionale.
Onm ka zbuluar se Thanza ka qene i dënuar në Piza të Italisë në vitin 1999, me 40 dite burg për vjedhje. Është vërtetuar se ai ka qenë i ndaluar ne flagrance gjatë kryerjes së krimit dhe prezent ne sallën e gjyqit. Vetë Thanza pranoi dënimin, po jo kryerjen e krimit, duke u justifikuar se e ka marre përsipër për humanizëm për të ndihmuar një person. Gjatë shpjegimeve ai përmendi se krimin e kishte marrë përsipër për llogari të kunatës, për të bërë të mundur kurimin e të nipit në Itali. Në këtë pikë të dëshmisë, Thanza edhe u përlot para gjyqtarëve të trupës së Vetting-ut.
Problem tjetër i nxjerrë në pah nga hetimet ishte fshehja e një procedimi penal që ishte nisur ndaj tij në vitin 2016, i pushuar nga një prokuror me inicialet KB.
Thanzës iu desh të jepte llogari edhe mosdeklarimin e një garazhi të marrë dhuratë nga një firmë ndërtimi, bashkë me tre familjarë të tij. Komisioni i Pavarur i Kualifikimit bëri me dije se kompania në fjalë ka qene pale ne dy çështje që janë ende ne proces, si dhe një çështje ne gjykatën e lartë në vitin 2017, ku Thanza ishte relator, e mbyllur në mars 2018. Thanza shjegoi se garazhi ishte blerë nga familjarët e tij, por pagesa qe kryer përpara noterizimit, shkak për të cilin ata kishin kryer akt dhurimi.
Probleme të shumta u evidentuan edhe me pasuritë e Thnazës. Deklarata e tij e pasurisë paraqiste mospërputhje të shumta lidhur me një apartament prej 135 metrash katrorë në Shkodër, si dhe dy apartamente të tjerë të shitur po në këtë qytetet. Probleme kishte edhe një apartament në Tiranë me sipërfaqe 113 metra katrorë e vendosur te Komuna e Parisit. Në 2003 bashkëshortja e ka deklaruar pasuri të vetën me vlerë 4 mln lekë, vlerë shumë më e ulët se tregu, sipas Komisionit të Pavarur të Kualifikimit. Probleme kishte edhe një Apartament i tipit Duplex te Gjiri i Lalzit, blerë në 2012, me sip 99.55 m, ndërkohë që në deklaratën Vetting të vitit 2017 rezulton 38 metra.
Deklaratat e të ardhurave të Thanzës paraqesin mospërputhje për një pjesë të mirë të karrierës së tij si gjyqtar, duke mos justifikuar dot blerjet e pronave. Vendimi për gjyqtarin jepet më 17 Korrik.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.