Goditen gjigantët e teknologjisë në Kinë / Katër firmat më të mëdha humbasin 60 mld USD në 3 ditë!

Gjigantët kinezë të listuara në 2 bursa, Alibaba, Baidu, JD.com dhe Netease, kanë humbur miliarda dollarë në vlerë tregu në vetëm pak ditë.

Humbjet erdhën prej kërcënimeve të çlistimit nga bursat amerikane.  Deri në mbylljen e ditës së Premte në bursën e Hong Kongut, vlera totale në treg e të katër gjigantëve ka humbur 60.3 miliardë dollarë, në vetëm 3 ditë.

Humbjen më të madhe e kishte Alibaba, me 39 miliardë dollarë. Baidu, motori më i madh i kërkimit në Kinë, u listua për herë të dytë në Hong Kong këtë Javë, me një debutim të dobët.   Ditën e Mërkurë, Komisioni i Bursave dhe Letrave me Vlerë në Shtetet e Bashkuar, kaloi një ligj që kërcënon të heqë kompanitë nga bursat amerikane, nëse nuk përputhen me standardet amerikane të auditit.

Ligji, i njohur si Akti i Llogaridhënies së Kompanive të Huaja, u kalua nga administrata e ish presidentit Donald Trump.  Firmat e identifikuara nga komisioni do t’i kërkohet audit nga një mbikëqyrës amerikan dhe do të duhet të tregojnë se nuk kontrollohen nga një ent qeveritar i huaj.

Kompanitë duhet të raportojnë gjithashtu nëse kanë ndonjë anëtar të bordit që është pjesë e Partisë Komuniste Kineze.  Përveç  këtyre pasigurive rregullatore, kompanitë e teknologjisë kineze po përballen edhe me sfida brenda vendit, ndërkohë që Pekini ka ashpërsuar kontrollin tek sektori, duke caktuar ligje anti-monopolit.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.