Goditja e Covid-19 në Amerikën Latine, Raporti: Do rritet norma e varfërisë, pritet një tkurrje me 10% këtë vit
Amerika Latine do të dalë nga pandemia e koronavirusit ne norma më të mëdha të varfërisë, ndërkohë që përpjekjet për të kontrolluar virusin kanë sjellë rritje të papunësisë dhe borxhit. Presidenti i Bankës Ndër-Amerikane për Zhvillim, Luis Alberto Moreno, deklaroi se Amerika Latine, ku rritja ekonomike ka qenë e ngadaltë në vitet e fundit, pritet të tkurret me 8% -10% në vitin 2020, për shkak të pandemisë dhe masave të karantinës.
“Pandemia nuk do të varfërojë vetëm Amerikën Latine, por të gjithë botën. Megjithatë kontinenti do të goditet shumë më rëndë, për shkak se përbëhet nga ekonomi në zhvillim”,- tha ai. Institucioni, që është huadhënësi më i madh rajonal i Amerikës Latine, do të miratojë këtë vit thuajse 20 miliardë dollarë në kredi. Rreth 15 miliardë dollarë nga këto do të shkojnë tek qeveritë për të fuqizuar sistemet e kujdesit shëndetësor.
Pavarësisht se tkurrja më e ashpër në rajon ka qenë në Venezuelë, Moreno tha se banka nuk mund të ofrojë financim për qeverinë e Nicolas Maduro, për shkak se administrata e tij ka dështuar të paguajë 700 milionë dollarë kredi. Venezuela ka qenë në recesion për 6 vite dhe norma vjetore e inflacionit ka kaluar 3,500%, sipas Asamblesë Kombëtare në vend. Moreno shtoi se rezervat e mëdha të naftës në Venezuelë, si dhe dekada të zhvillimit të infrastrukturës falë të ardhurave prej naftës nga vitet e kaluara, nënkupton se do të ketë një shans më të mirë për të ringjallur ekonominë, pasi të ndërrohet qeveria.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.