Goditja e pasurive të krimit/Krijohet edhe një tjetër strukturë e re në Policinë e Shtetit! Përbëhet nga ministra e prokurorë

Pas aktit normativ që synon të godasë pasurinë e krimit përmes Operacionit Forca e Ligjit, në kuvend është depozituar një amendament ligjor që shkon sërish në këtë drejtim.

Në Policinë e Shtetit do të krijohet një strukturë e re e emërtuar Komiteti Kombëtar i Politikave për Parandalimin dhe Luftën Kundër Krimit të Organizuar.

Referuar nismës që ndodhet në Kuvend, ky Komitet do të krijohet e funksionojë pranë ministrit të Brendshëm dhe do të ketë për objekt të veprimtarisë së tij hartimin, koordinimin, monitorimin dhe vlerësimin e strategjive dhe të planit të masave për parandalimin e krimit të organizuar. Drejtimi i Komitetit do të bëhet nga ministri i Brendshëm dhe në përbërje të tij do të ketë ministrin e Drejtësisë, ministrin e Financave dhe Ekonomisë, Prokurorin e Përgjithshëm, drejtuesin e Prokurorisë së Posaçme kundër Korrupsionit dhe Krimit të Organizuar, drejtorin e Shërbimit Informativ të Shtetit, drejtorin e Përgjithshëm të Policisë së Shtetit, drejtorin e agjencisë përgjegjëse për luftën kundër terrorizmit dhe drejtorin e agjencisë përgjegjëse për parandalimin e pastrimit të parave.

“Komiteti, gjithashtu, do të ketë në funksion të tij hartimin dhe publikimin e të dhënave mbi studime që identifikojnë shkaqet bazë të krimit, kontrolle sigurie, tendencat dhe kërcënimet e krimit të organizuar, rrethanat në të cilat vepron krimi i organizuar, grupet profesionale dhe teknologjitë e përfshira në kriminalitet, duke përfshirë palët shtetërore dhe joshtetërore, efektivitetin dhe efiçencën e ligjeve, të politikave dhe të planeve të masave për të parandaluar dhe ulur krimin e organizuar, përmbushjen e detyrimeve që rrjedhin nga marrëveshjet ndërkombëtare” shkruhet në relacionin e projektligjit.

Propozimi për këtë ndryshim bazohet në rekomandimet e Komitetit të Ekspertëve të Vlerësimit të Masave Kundër Pastrimit të Parave, Financimit të Terrorizmit dhe Armëve të Dëmtimit në Masë, i njohur si Komiteti MONEYVAL.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.