Goditja më e madhe globale – Arrestohen 150 persona në tregtinë e paligjshme në internet e njohur si Dark Web

Rreth 150 persona u arrestuan në një nga goditjet më të mëdha globale ndaj tregtisë së paligjshme në një faqe interneti të paligjshme e njohur si ‘Dark Web’, njoftoi Europol.

Operacioni DarkHunTOR filloi pas çmontimit nga policia gjermane të DarkMarket, një prej tregjeve të zeza kibernetike kryesore.

Që atëherë, një seri “veprimesh të veçanta, por plotësuese” janë kryer në Australi, Bullgari, Francë, Gjermani, Itali, Holandë, Zvicër, Mbretërinë e Bashkuar dhe Shtetet e Bashkuara”, tha Europol.

Si rezultat, 65 persona u arrestuan në SHBA, 47 në Gjermani, 24 në Britani të Madhe dhe katër në Itali dhe Holandë secila.

Disa nga të arrestuarit ishin “objektivë me vlerë të lartë”, tha Europol.

Rrjeti i errët është një grup faqesh interneti që janë të aksesueshme vetëm përmes një shfletuesi të veçantë të internetit që kodon aktivitetin e përdoruesit në mënyrë që ta mbajë atë anonim dhe privat. Kjo është arsyeja pse favorizohet nga rrjetet kriminale.

Policia sekuestroi gjithashtu 26.7 milionë euro në para të gatshme dhe valuta elektronike, si dhe drogë, duke përfshirë 25,000 tableta ekstazi dhe 45 armë zjarri.

Në Itali, policia mbylli gjithashtu tregje ilegale të quajtura “DeepSea” dhe “Berlusconi”, të cilat mes tyre kishin “më shumë se 100,000 reklama për produkte të paligjshme”, sipas Europol, operacioni i të cilit ishte i koordinuar me Eurojust, agjencia evropiane për bashkëpunimin gjyqësor.

“Qëllimi i operacioneve si ky është t’u dërgohet një mesazh kriminelëve që veprojnë në rrjetin e errët që komuniteti i zbatimit të ligjit ka mjetet dhe partneritetet ndërkombëtare për t’i demaskuar dhe për t’i mbajtur ata përgjegjës për aktivitetet e tyre të paligjshme, madje edhe në zonat e errëta të internetit”, tha Zëvendësdrejtori i Operacioneve të Europolit, Jean-Philippe Lecouffe.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.