“Goditje” në tregun e verës – Kritere të reja për prodhimin dhe tregtimin, shmangen abuzimet
Qeveria parashikon të ndërhyjë në rregullimin e tregut të prodhimit dhe tregtimit të verës, me qëllim vendosjen e rregullave dhe përcaktimin e kritereve të sakta, duke tentuar të që minimizojë abuzimet që ndodhin aktualisht.
Ministria e Bujqësisë është duke përgatitur një projektligj “Për Vreshtarinë dhe Verën” , i cili synon të qartësojë rregullat për prodhimin, për praktikat enologjike të autorizuara e kufizimet që zbatohen për prodhimin e përgatitjen për treg si dhe për emërtimin e origjinës, të treguesve gjeografikë dhe për termat tradicionale të rrushit, verës dhe produkteve të tjera.
Tregu i verës është ndoshta ndër më informalët nga të gjitha industrisë e tjera. Kjo për shkak se është një treg relativisht i ri në standarde dhe hapësirat për abuzime janë të mëdha.
Po ashtu, ndërhyrjet në legjislacion dhe kontrolli nga strukturat përgjegjëse ka munguar, duke nxitur konkurrencën e pandershme si dhe deri diku mungesën e cilësisë. E gjithë industria e verës përfshirë prodhimin vendas dhe importin vlerësohet të ketë një volum tregtar prej rreth 2 miliardë lekë ose rreth 15 milionë euro në vit, ku pjesën më të madhe e zë prodhimi i huaj.
Aktualisht ky treg është i ndarë në thuajse 30% prodhim vendas dhe 70% import. Në Shqipëri prodhohen në vit rreth 2 millionë litra verë dhe sipas prodhuesve në të gjithë vendin janë rreth 100 kantina serioze, ndërsa vetëm rreth 10 prej tyre kanë prodhim sasior më të lartë dhe në normat e prodhimit të standardeve që kërkon kjo industri. Së shpejti nis dhe procesi i konsultimit për një ndër industritë më pak të zhvilluara në Shqipëri.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.