Goldman, me ekzekutiv të ri – Solomon pritet të mbajë një nga postet më të forta në Wall Street
Banka e investimeve në SHBA, Goldman Sachs, pritet të caktojë presidentin, David Solomon, në rolin e kreut ekzekutiv këtë javë. Lajmërimi do të zëvendësonte Lloyd Blankfein, në një nga postet më të forta ekzekutive në Wall Street. Solomon, konsiderohej si zëvendësuesi i Blakfein, që kur u caktua presidenti i firmës në muajin Mars, por lajmërimi formal nuk pritej deri në vjeshtë.
Arsyeja e lajmërimit të parakohshëm për Goldman, që do të raportojë rezultatin për tremujorin e dytë këtë javë, nuk është ende e ditur.
Banka po has probleme me njësinë e tregtimit të titujve, që ka rezultuar shumë më pak përfituese krahasuar me periudhën përpara krizës. Për të mbuluar këtë hendek, firma është përqendruar në alternativa të tjera të gjenerimit të parasë, si huadhënia drejt konsumatorëve.
Solomon është bankier i vjetër i investimeve dhe ka manaxhuar njësinë e tregtimit të obligacioneve mbeturinë ose “junk”, te banka Bear Stearns. Ai iu bashkua Goldman Sachs në vitin 1999 dhe më vonë u bë kreu i bankingut të investimeve. Këtë post e mbajti për 1 dekadë, përpara se të bëhej president i bankës dhe tashmë, pritet të zëvendësojë kreun ekzekutiv.
Ndër prioritetet që ai ka bërë të ditur më parë për bankën janë; bashkëpunimi për barazinë gjinore te punonjësit dhe koordinimi i njësive të ndryshme që i shërbejnë klientëve të njëjtë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.