Google do të konkurrojë Apple në tregun e orëve digjitale – Blen kompaninë më të re për shumën 2.1 bilionë dollarë

Kompania Alphabet Inc. e Google ka rënë dakord për të blerë kompaninë prodhuese të orëve, ‘Fitbit Inc.’ për 2.1 bilion dollarë, një lëvizje e cila pritet të shtojë aktivitetin e hardwareve për gjigandin teknologjik, por gjithashtu duke tërhequr edhe vëmendjen e ligjvënëseve amerikanë.

Kjo blerje do të jetë e dyta për Google në këtë vit, pasi pranoi të shpenzonte 2.6 bilion dollarë për software-n e ruajtjes së të dhënave në cloud, ‘Looker’ në qershor.

Marrëveshja e fundit patjetër do tërheqë vëmendjen e qeverisë amerikane. Autoritetet shtetërore dhe federale po investigojnë Google për përdorimin e praktikave të jashtëligjshme në konkurrencën me bizneset e tjera. Më specifikisht kompania akuzohet se ka abuzuar me të dhënat e përdoruesve dhe mënyrën se si operon me reklamat dixhitale.

Edhe pse Google nuk është një lider në tregun e orave dixhitale dhe atyre të fitnesit, ligjvënësit do të jenë të interesuar të dinë se çfarë do të bëhet me të dhënat e miliona përdoruesve të kompanisë Fitbit.

Google viteve të fundit është futur në tregun e smartphone, laptopëve dhe atyre të audio bokseve me asistent personal, por ende nuk ka prodhuar një orë të vetën.

Kjo pritet të ndryshojë shumë shpejt, siç është paralajmëruar edhe nga drejtuesit e kompanisë:

“Në vitet në vazhdim Google pritet të prezantojë paisjet e reja fizike dhe të përdorshme nga të gjithë, Made by Google.”

Blerja e Fitbit i jep Google një platformë të re ku mund të operojë, me akses edhe në 27 milionë përdoruesit aktivë të kompanisë. Fitbit gjithashtu ka shitur më shumë se 100 milionë paisje dhe është angazhuar në krijimin e një komuniteti global.

Fitbit ka pasur mjaft vështirësi në konkurrencën me Apple dhe kompani të tjera në tregun e orave dixhitale viteve të fundit, mirëpo me marrëveshjen e re që pritet të finalizohet vitin e ardhshëm Google do përpiqet me çdo kusht të zërë vendin e parë në treg.

SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.